ЦХИНВАЛ, 20 фев - Sputnik, Козаты Диана. Хуссар Ирыстоны милицийы кусджытӕ сбӕрӕг кодтой Цхинвалы 51-аздзыд цӕрӕг сылгоймаджы фатермӕ бабырсты хъуыддаг. Бабырсты рӕстӕджы зианбаййафӕг уыд хӕдзары, фехъусын кодта Мидхъуыддӕгты министрады (МХМ) пресс-службӕйы кусӕг Джиоты Алик.
Адавд сӕххӕст кодтой ӕртыццӕджы изӕры. Зианбаййафӕг уый тыххӕй фехъусын кодта Мидхъуыддӕгты министрады радгӕсон хайадмӕ.
"Сылгоймаджы ныхӕстӕм гӕсгӕ, уымӕ фатермӕ бахостой ӕбӕрӕг гоймӕгтӕ. Дуар куы бакодта, уӕд хӕдзармӕ бахызтысты дыууӕ нӕлгоймаджы маскӕты ӕмӕ, хӕцӕнгарзӕй ӕртхъирӕн гӕнгӕйӕ, ракуырдтой ӕхцатӕ. Фыдгӕнджытӕй иу басгӕрста фатер ӕмӕ ссардта ӕхцайы фӕрӕзтӕ 350 мин сомы бӕрц, уый фӕстӕ фыдгӕнджытӕ фӕтары сты цауы бынатӕй", - радзырдта Джиоты Алик.
Йӕ ныхӕстӕм гӕсгӕ, фыдгӕнджыты уайтагъд агурын райдыдтой милицийы къордтӕ. МХМ кусджытӕ оперативон-сгарӕн мадзӕлтты рӕстӕджы сбӕрӕг кодтой Цхинвалы дыууӕ цӕрӕджы. Уыдонӕй иуы ӕрцахстой.
Мидхъуыддӕгты органтӕ уадзынц оперативон-сгарӕн мадзӕлтты комплекс, цӕмӕй ӕрцахсой дыккаг зӕрдӕхсайгӕ нӕлгоймаджы.
