ЦХИНВАЛ, 4 мар - Sputnik, Козаты Диана. Хуссар Ирыстоны культурӕйы министры хӕдивӕгæй снысан кодтой раздӕры депутат Къацты Филиппы.
Министры ног хӕдивӕджы кандидатурӕ ӕртыццӕджы хорзыл банымадта хицауад.
"Къацты Филипп у зындгонд адӕймаг. Иууылдӕр ӕй зонынц куыд хорз актер ӕмӕ разамонӕгӕй", - загъта культурӕйы министр Зассеты Жанна.
Йӕ ныхӕстӕм гӕсгӕ, культурӕйы министрады Къацты Филипп йӕ цӕст дардзӕн паддзахадон проекттӕм, социалон фарстытӕм, афтӕ ма аппараты куыстмӕ.
Къацты Филипп раздӕр дӕр уыд культурӕйы министры хӕдивӕг, уый фӕстӕ куыста Паддзахадон драмон театры директорӕй. 2014 азы йӕ равзӕрстой Хуссар Ирыстоны парламенты депутатӕй.
