ЦХИНВАЛ, 17 мар - Sputnik, Биазырты Дзерассæ. Архиепископ Дзæуджыхъæуккаг æмæ Алайнаг Леонид æруынаффæ кодта Уæрæсейаг Библион æхсæнадимæ (УБӔ) библи ирон æвзагыл рауадзыны актуалон фарстыл. Фембæлд уагъд æрцыд Данилайы номыл моладзандоны, Мæскуыйаг патриархаты æддагон дзуарон бастдзинады хайады.
Фембæлды хайадисджытæй иу Вадим Жижин банысан кодта, 2020 азы июны кæй балхынцъ уыдзæн Ног Фæдзæхст æмæ Рагон фæдзæхсты канонон текстты тæлмац ирон æвзагмæ. Уый фæстæ æрывналдзысты мыхуыры агъоммæ цæттæгæнæн куыстытæм.
"Архиеписком Леонидимæ фембæлды æрдзырдтам, Библийы мыхуыр хаст кæй æрцæудзæн Аланийы Дзуарæфтыды фæлгæтты мадзæлттæм. Мах лыстæггай æруынаффæ кодтам рауагъды детальтыл. Уымæй дарддæр ма дзырд цыд фидæны æнæканонон тексттæ ратæлмац кæныныл дæр", - радзырдта Жижин.
Библийы ирон æвзагмæ ратæлмац кæнын у Библийы тæлмац кæныны институт æмæ Уæрæсейаг Библион æхсæнады иумæйаг проект. Лингвисттæ æмæ динамонджытæ кусынц проектыл ныр цыппæрæм азы.
