ЦХИНВАЛ, 9 июн – Sputnik, Козаты Диана. Ӕртӕ адӕймаджы мӕрдон буӕрттӕ, кӕцытӕ ссардтой Багаты хъӕуы цур, баныгӕдтой дӕс азӕй фылдӕры размӕ, фехъусын кодта Sputnik Хуссар Ирыстоны Генералон прокуратурӕйы фӕдагуырды хайады минӕвар Джиоты Константин.
Мидхъуыддӕгты министрады (МХМ) пресс-службӕ знон фехъусын кодта адӕймаджы стӕгдартӕ ссарыны тыххӕй Цхинвалы районы. Уыдон ссардта бынӕттон цӕрджытӕй иу хъӕууон хӕдзарадон куыстыты рӕстӕджы ӕмӕ фехъусын кодта уый тыххӕй барадхъахъхъӕнӕг органтӕм.
"Нырма нӕм дырыс информаци нӕй. Мӕ бон у ӕрмӕстдӕр зӕгъын, стӕгдартыл кӕй цӕуы дӕс азӕй фылдӕр", - загъта Джиоты Константин.
Уый ма банысан кодта, ацы стӕгдартӕ кӕй не сты адӕмы, кӕцытӕ фӕмард сты 2008 азы августы хӕсты рӕстӕджы.
Джиоты Константин бафтыдта, зӕгъгӕ, дарддӕр уагъд цӕуы цауы фӕдыл басгӕрст.
