ЦХИНВАЛ, 13 июл - Sputnik, Козаты Диана. Хуссар Ирыстоны дыккаг суткӕ нӕ бӕрӕг кӕнынц коронавирусӕй ног рынчынты, стационары хоскӕнынад цӕуынц дыууӕ адӕймаджы. Уыдонӕн инфекци рабӕрӕг кодтой ивгъуыд цыппӕрӕмы тестты фӕстиуджытӕм гӕсгӕ, фехъусын кодта Югосетпотребнадзоры сӕргълӕууӕджы хӕдивӕг Гаглойты Анна.
Пандемийы рӕстӕджы республикӕйы коронавирус сбӕрӕг кодтой 87 адӕймагӕн, уыдонӕй 85 сӕнӕниз сты. Фӕрынчынуӕвджытӕн низ ацыд рог формӕйы, арӕнӕвӕрдон мадзӕлтты руаджы та вирус нӕ рахызт медицинон уагдӕттӕй.
"Фӕстаг суткӕйы мах не сбӕрӕг кодтам ног рынчынты. Инфекцион рынчындоны хоскӕнынад цӕуынц дыууӕ адӕймаджы. Уыдон ӕрӕджы ӕрцыдысты Цӕгат Ирыстонӕй ӕмӕ сӕ бакодтой карантины", - загъта Гаглойты Анна.
Йӕ ныхӕстӕм гӕсгӕ, карантины сты 147 адӕймаджы, сӕ нымӕцы кусджытӕ, кӕцыты фӕхуыдтой республикӕмӕ.
Республикӕйы иумӕйагӕй ауагътой 2900-ӕй фылдӕр тесты.
