ЦХИНВАЛ, 16 июля – Sputnik, Гӕбӕраты Элина. Хуссар Ирыстоны схорзӕхджын кодтой скъоладзауты конкурсы уӕлахиздзауты, кӕцыйы темӕ баст уыд 1920 азы ирон адӕмы геноцидимӕ
2020 азы сӕдӕ азы ӕххӕст кӕны ирон адӕмы геноцидыл, кӕцы сӕххӕст кодта Гуырдзыстоны къухдариуӕгад 1920-ӕм ӕзты. Республикӕйы уагъд цӕуынц фыдохы мадзӕлттӕ. Уый фӕдыл расидтысты уацмысты конкурс 14-17 азы кары сывӕллӕтты хсӕн ахӕм темӕйыл "Геноцид осетинского народа в 1920 году... Что я о нем знаю?".
Президенты æххæстбарджын сывæллæтты барты фæдыл Козаты Гульнара банысан кодта, къамис кӕй райста 46 уацмысы.
"Конкурс уагъд цыд, цӕмӕй рӕзгӕ фӕлтӕр зоной ирон адӕмы трагедийы тыххӕй. Мах фӕндыд, цӕмӕй сымах фылдӕр базонат уыцы трагикон цауты тыххӕй", - банысан кодта уый.
Сывӕллӕтты омбудсмен бахахх кодта, компетентон жюрийы куысты фӕстиуджытӕм гӕсгӕ сбӕрӕг кодтой ӕртӕ уӕлахиздзауы ӕмӕ ӕхсӕз призеры алыгъуызон номинациты.
Мадзалмӕ бацыд президент Бибылты Анатолий, кӕцы ӕрсидт фӕсивӕдмӕ, цӕмӕй алыхатт дӕр агурой ног зонындзинӕдтӕ.
Бибылты Анатолий загъта бузныг Козаты Гульнарайӕн конкурсы организацийы тыххӕй, афтӕ ма ахуырадзаутӕн дӕр, кӕцытӕ бӕрнон ахаст дардтой сӕ хӕслӕвӕрдмӕ, сахуыр кодтой истори ӕмӕ бацӕттӕ кодтой уацмыс.
"Адӕмӕн, кӕцы нӕ зонынц сӕ истори, нӕй фидӕн. Мах хъуамӕ хъуыды кӕнӕм нӕ адӕмы геноцид ӕмӕ алцыдӕр саразӕм, цӕмӕй дуне дӕр базона уый тыххӕй", - банысан кодта президент.
Хуссар Ирыстоны ахуырады министр Гасситы Натали банысан кодта, аналогион конкурс эссе фидӕн аз кӕй ауадздзӕн ахуырады министрад ӕмӕ ӕрсидт сывӕллӕттӕм, цӕмӕй дзы активон хайад райсой.
Конкурсы фӕстиуджытӕм гӕсгӕ уӕлахиздзау ссис Сиукъаты Карина Дзауы поселокӕй, дыккаг бынат бацахста Дзеранты Элина, ӕмӕ ӕртыккаг бынатыл та ацыд Хуыгаты Сослан Цхинвалӕй.
Хайадисджыты иууылдӕр схорзӕхджын кодтой зӕрдылдарӕн лӕвӕрттӕй, сӕ уацмыстӕ та сын ныммыхуыр кӕндзысты Интернеты.
