ЦХИНВАЛ, 20 июл - Sputnik, Козаты Диана. Паддзахадон ӕдасдзинады комитеты (ПӔК) кусджытӕ ссардтой Ленингоры районы хӕстӕрмӕджыты ӕвӕрӕн. Уагдоны бахахх кодтой, хӕстӕрмӕджытӕй гӕнӕн ис кӕй спайда кодтаиккой гарзджын провокацитӕ ауадзыны нысанӕн Хуссар Ирыстоны территорийыл.
"Иумӕйаг оперативон-профилактикон мадзӕлтты фӕлгӕтты 15 июлы Хуссар Ирыстоны ПӔК Уӕрӕсейы Федералон ӕдасдзинады службӕйы Арӕнгӕрон хайадимӕ иумӕ Ленингоры районы цӕрӕг пункт Гдулеты ӕдзӕрӕг хӕдзары ссардтой хӕстӕрмӕджытӕ. Сӕ нымӕцы: 7,62 ӕмӕ 5,45 калибры 376 нӕмыджы, гранатӕхсӕны авд нӕмыджы, ӕртӕ гранатӕйы, цыппар запалы гранатӕтӕн, электрикон детонатортӕ, афтӕ ма ифтонггарз", - хъусын кӕны къуырисӕры уагдоны пресс-службӕ.
ПӔК банысан кодтой, хӕцӕнгарз, йӕ хӕйттӕ ӕмӕ хӕстӕрмӕджытӕ ӕнӕзакононӕй ӕлхӕнын, уӕй кӕныны, ӕвӕрын, ласын у уголовон фыдракӕнд.
"Гуырдзыстонимӕ паддзахадон арӕныл уӕззау уавӕр хынцгӕйӕ хӕстӕрмӕджыты ӕвӕрӕн гӕнӕн ис уыдаид гарзджын провакацитӕ ауадзыны тыххӕй Хуссар Ирыстоны территорийыл", - банысан кодтой ПӔК.
Республикӕйы компетентон органтӕ ацы цауы фӕдыл уадзынц сгарӕн мадзӕлттӕ.
