ЦХИНВАЛ, 21 июл - Sputnik. Цхинвалы районы Джеры комы сцалцӕг кӕндзысты хъӕууон фӕндаг, фехъусын кодта Sputnik районы администрацийы Цӕрӕн-коммуналон хӕдзарады (ЦКХ) сӕргълӕууӕджы хӕстӕ ӕххӕстгӕнӕг Уазӕгты Мевлуд.
Уый банысан кодта, ныридӕгӕн кӕй сног кодтой фӕндӕгтӕ цӕрӕг пунктты Мамысантӕ, Гудзабар, Уанат – Ортъеу, Уанат – Сацхен – ӕмткӕй 15 километры.
"Ӕввахс бонты райдайдзыстӕм кусын Уанат-Джер фӕндагыл. Фӕндаг, кӕцы цӕуы кувӕндонмӕ, цалцӕг кӕнынц ӕрвылаз. Фарон дзы хуыр ныккалдтам, фӕлӕ уалдзӕджы фӕндаг аласы дон. Ахӕм цалцӕг хъӕуы уадзын иудадзыг", - загъта Уазӕгты Мевлуд.
Уанат-Джер фӕндаджы хайы дӕргъ у 14 километры.
Ӕвзӕр фӕндӕгтӕ ӕмӕ донифтонгады цухдзинад сты Хуссар Ирыстоны Цхинвалы районы хъӕуты проблемӕтӕ. Ацы здӕхты куыстытӕ иууылдӕр ӕххӕст кӕны районы ЦКХ.
