ЦХИНВАЛ, 12 авг – Sputnik, Плиты Фатимæ. Цӕгат Ирыстоны медицинон академийы студенткӕ Кокойты Илона фондз азы дæргъы фыццаг хатт сӕрдыгон практикӕ рацыд Хуссары Ирыстоны бирӕпрофилон медицинон центры, сывæллæтты рынчындоны. Ног уавӕрты ахуыргӕнӕн куыст чызгыл ныууагъта ӕнӕнхъӕлӕджы ӕвӕццаг тӕлмӕнтӕ, радзырдта уый йæ интервьюйы Sputnik.
"Карантин кӕй уыд, уый аххосагӕй баззадтӕн Цхинвалы мартӕй фӕстӕмæ. Махӕн практикӕйы тыххӕй куы фӕхъусын кодтой ӕмӕ йӕ куы бамбӕрстон, ам æй хъӕудзӕн рацӕуын, уӕд мын хъыг уыд, уымӕн ӕмӕ бирӕ ӕппӕрццаг ныхæстæ хъуыстон рынчындоны тыххӕй", - радзырдта чызг.
Фæлæ, йæ ныхæстæм гæсгæ, куы рацыд практикæ, уæд йæ хъуыды цæхгæр аивта.
"Тынг хорз нӕ райстой. Мах куыстам исӕн хайады, æххуыс кодтам рынчынты исынæн. Карантин кӕй уыд, уымӕ гӕсгӕ рынчынты нымӕц афтӕ бирӕ нӕ уыд. Фылдӕр уыдон фылдæр бæрцæй уыдысты, чи фӕхъӕстӕ ис ахæмтæ ӕмӕ аппендицитимӕ пациенттæ. Педиатри нын амыдта Туаты Инесса, хирургийы тыххæй та ныхас кодтам Джиоты Луизаимӕ. Ам чи ацыд практикӕ, уыдон се 'ппӕт дӕр райстой иттӕг хорз нысӕнттӕ", - бафтыдта студенткæ.
Илона фыццаг хатт рацыд практикæ Цхинвалы, иннæ хæттыты иу æй сфидар кодтой Цӕгат Иры рынчындонмæ.
"Уым куыст уыд фылдӕр, уымӕн ӕмӕ фылдӕр рынчынтӕ уыд. Ӕндӕр дыууӕ ран дӕр иу хуызон цыд практикӕ", - бахахх кодта уый.
Фидæны дохтыр ма банысан кодта, йӕ ахуыр ӕмӕ практикæйы рæстæджы уый кæй бамбӕрста, раст професси кӕй равзӕрста.
"Чысылӕй мæ фӕндыд суӕвын дизайнер, фӕлӕ йӕ ныр бамбӕрстон, дохтыры дӕсныйады мӕн кӕй у", - балхынцъ кодта уый.
Хуссар Ирыстоны бирæпрофилон медицинон центры практикæ Илона цыд фыццæгæм маййæ июны кæронмæ.
