ЦХИНВАЛ, 21 авг – Sputnik, Хъуылымбегты Азӕмӕт. Хуссар Ирыстоны ивгъуыд суткӕйы дӕргъы не сбӕрӕг кодтой коронавирусӕй ног рынчынты, медикты хъусдарды бын карантины сты 236 адӕймаджы, фехъусын кодта Sputnik Югосетпотребнадзоры сӕргълӕууӕджы хӕдивӕг Гаглойты Анна.
"Ивгъуыд суткӕйы ауагътой 67 тесты, ног рынчынты не сбӕрӕг кодтой. Фӕсарӕйнаг аразджыты дӕр, кӕцытӕ ӕрцыдысты Хуссар Ирыстонмӕ, бакодтой карантины", - загъта Гаглойты Анна.
Пандемийы рӕстӕджы республикӕйы сарӕзтой 4466 тесты.
Хуссар Ирыстоны коронавирусӕй ног рынчынты нӕ бӕрӕг кӕнынц 16 июлӕй фӕстӕмӕ. Фӕстаг рынчыны рафыстой инфекцион хайадӕй 10 августы.
Хуссар Ирыстоны дарддӕр ис ӕнӕмӕнг карантин ӕрцӕуӕггӕгтӕн. Изоляцийӕ ссӕрибар кодтой коронавирусӕй уый размӕ чи фӕрынчын, уыдоны. Уый тыххӕй уыдон хъуамӕ радтой анализтӕ Цӕгат Ирыстоны ӕмӕ бавдисой уый фӕдыл справкӕтӕ.
