ЦХИНВАЛ, 1 сен - Sputnik, Хъуылымбегты Зӕлинӕ. Хуссар Ирыстоны аргъӕвтой къамты конкурс "Ирыстон фокусы" фӕуды датӕ 20 сентябрьмӕ. Скъуыддзаг рахастой конкурсон куыстытӕ кӕй нӕ фаг кӕнынц, уый тыххӕй, радзырдта Sputnik проекты координатор, фӕсивӕдон политикӕ ӕмӕ спорты фӕдыл комитеты пресс-службӕйы кусӕг Джуссойты Диана.
"Хицӕн номинациты куыстытӕ кӕй нӕ фаг кодтой, уый фӕдыл аскъуыддзаг кодтой адарддӕр кӕнын конкурс сентябры кӕронмӕ. Ныртӕккӕ къамты конкурс "Ирыстон фокусы" алыгъуызон номинациты хайад исынц 22 конкурсанты", - бафтыдта уый.
Конкурсы уыд фараст номинацийы: натюрморт, портрет, сюжет, репортаж, националон колорит, фендтаг бынӕттӕ, зайӕгойтӕ, анималистикӕ ӕмӕ пейзаж.
"Фӕстагмӕ мах бафтыдтам ноджы иу номинаци "спортивон къам", - бахахх кодта Джуссойты Диана.
Конкурсы хайад райсыны бар ис алкӕмӕндӕр, чи цӕры Хуссар Ирыстоны территорийыл. Алкӕцы дӕс номинацийы дӕр равзардзысты уӕлахиздзауы.
