ЦХИНВАЛ, 16 сен – Sputnik, Хъуылымбегты Азӕмӕт. Цхинвалы районы коммуналон кусджытӕ уадзынц донифтонгады хахх Дампалеты хъӕумӕ. Уый тыххӕй Sputnik фехъусын кодта Цхинвалы районы администраци Цӕрӕнуатон-коммуналон хӕдзарады (ЦКХ) хистӕры хӕстӕ ӕххӕстгӕнӕг Уазӕгты Мевлуд.
"Куыстытӕм бавнӕлдтой ӕрӕджы, нывӕндӕм сӕ балхынцъ кӕнын ӕввахс рӕстӕджы. Донифтонгады хаххы дӕргъ у 2 километры", - загъта Уазӕгты Мевлуд.
Йӕ ныхӕстӕм гӕсгӕ, ӕмрӕстӕджы районы коммуналон кусджытӕ уадзынц уӕлӕмхасӕн донифтонагды хахх Дменисы хъӕумӕ. Ацы егъау цӕрӕг пункты уӕллаг хайы рагӕй ис доны цухдзинады проблемӕ.
Амӕй размӕ Цхинвалы районы срӕвдз кодтой донифтонгад Арцеу, Зар ӕмӕ Ортъеуы хъӕутӕм. Уӕлӕмхасӕн хахх ауагътой Цъунары хъӕумӕ дӕр.
"Фидӕн къуыри бавналдзыстӕм донифтонагды хаххы арӕзтадмӕ Андисы хъӕумӕ", - банысан кодта Уазӕгты Мевлуд.
Уый бафтыдта, ӕввахс рӕстӕджы кӕй аскъуыдзаг кӕндзысты доны проблемӕ Стыркомы хъӕуы дӕр.
