ЦХИНВАЛ, 14 окт — Sputnik, Козаты Диана. Ивгъуыд суткӕйы Хуссар Ирыстоны коронавирус сбӕрӕг кодтой 21 адӕймагӕн, фехъусын кодта Sputnik "Центр гигиены и эпидемиологии"-йы сӕйраг дохтыр Томайты Зӕлинӕ.
Коронавирусӕй рынчынты нымӕц майӕ фӕстӕмӕ схызт 173 онг, Уӕрӕсеимӕ арӕны баконды фӕстӕ инфекци рабӕрӕг кодтой 83 адӕймагӕн.
"Ивгъуыд суткӕйы сарӕзтам 95 басгӕрсты, уыдонӕй 21 радтой ӕвӕрццаг фӕстиуӕг", - загъта Томайты Зӕлинӕ.
Коронавирусӕй рынчынты хай хос кӕнынц хӕдзары, аннӕ хайы та бахъуыд госпитализаци. Афтӕ ма, контактон гоймӕгтӕй бирӕтӕ ацыдысты хисӕрмагонд изоляцийы.
Республикӕйы ӕртыццӕгӕй карантиныл сӕхгӕдтой дыууӕ скъола ӕмӕ дыууӕ сабидоны районты, афтӕ ма хицӕн къордтӕ дыууӕ сабидоны Цхинвалы.
Амӕй размӕ Ӕнӕниздзинад хъахъхъӕнынады министрады хъусын кодтой, Республикон бирӕпрофилон медицинон центры сывӕллӕтты рынчындон кӕй цӕттӕ кӕнынц коронавирусон инфекцийы ныхмӕ тох кӕнынмӕ. Медицинон уагдонӕн йӕ бон уыдзӕн райсын COVID-19-ӕй 100 рынчыны.
