ЦХИНВАЛ, 20 окт - Sputnik, Плиты Фатимӕ. Хуссар Ирыстоны Зонад-иртасӕн институты (ЗИИ) бӕстыхай райдыдтой цалцӕг кӕнын. Паддзахады сӕргълӕууӕджы пресс-секретарь Гасситы Дина куыд фехъусын кодта Sputnik, афтӕмӕй цалцӕггӕнӕн куыстытӕн фӕрӕзтӕ самал кодтой президенты фӕстауӕрцон фондӕй.
"Зонад-иртасӕн институты кусджыты стыр хайбавӕрд зонадмӕ хынцгӕйӕ нӕй руадзӕн, цӕмӕй ацы уагдон уыдаид дарддӕр дӕр ахӕм уавӕрты. Президенты фӕстауӕрцон фондӕй хицӕн ӕрцыд 6 милуан 550 мин сомы цалцӕгӕн. Уый у ӕрмӕст фыццаг къахдзӕф", - загъта Гасситы Дина.
Уый ма зӕрдыл ӕрлӕууын кодта, бӕстыхай ӕмбӕлон уагмӕ ӕркӕныны фарстыл кӕй дзырдта президент йӕ ныстуаны адӕм ӕмӕ парламентмӕ. Уӕд Бибылты Анатолий банысан кодта, ӕнӕмӕнг кӕй хъӕуы сфидар кӕнын институты материалон базӕ, уый хъуамӕ дзуапп дӕтта зонадон уагдоны бӕрзонд статусы домӕнтӕн.
Цхинвалы ӕрӕвнӕлдтой Зонад-Иртасӕн институты бӕстыхай цалцӕг кӕнынмӕ
© Sputnik / Фатима Плиева
Зонадон уагдон мӕгуырау уавӕры ис 2008 азы августы гуырдзиаг-ирон хӕстӕй фӕстӕмӕ. Йе 'ддаг фарсыл ныр дӕр ирдӕй зыны агрессийы зиан - нӕмгуыты фӕдтӕ.
