ЦХИНВАЛ, 21 дек - Sputnik. Президент Бибылты Анатолий раарфӕ кодта ӕмӕ схорзӕхджын кодта паддзахадон хъахъхъӕнынады службӕйы кусджыты уагдоны сӕвзӕрдыл 19 азы сӕххӕсты цытӕн, хъусын кӕны республикӕйы сӕргълӕууӕджы пресс-службӕ.
"Уӕ профессионалон архайд сӕвӕрдта сымахыл стыр бӕрндзинад. Уӕ компетенцийы ис паддзахадон гоймӕгтӕ, паддзахадон бӕстыхӕйттӕ ӕмӕ уагдӕттӕ хъахъхъӕнын. Уӕ службӕйы сымах ӕвдисут сӕрмагонд дисциплинӕ, профессионализм ӕмӕ патриотизм", - загъта Бибылты Анатолий.
Президент бафтыдта, зӕгъгӕ, абоны бон уагъд цӕуынц мадзӕлттӕ, цӕмӕй фӕхуыздӕр кӕной паддзахадон хъахъхъӕнынады кусджыты цӕттӕдзинад.
"Ныфс мӕ ис, Уӕрӕсейы Федерациимӕ бадзырдтӕ уӕ профессионалон курдиат фӕфылдӕр кӕныны фӕдыл реализаци ӕрцӕудзысты 2021 азы", - банысан кодта президент.
Паддзахадон хъахъхъӕнынады иууыл хуыздӕр кусджытӕн радтой Хуссар Ирыстоны кады грамотатӕ ӕмӕ майдантӕ "Защитнику Отечества", "За службу на страже мира в Южной Осетии", "В ознаменование 10-летия Победы в Отечественной войне народа Южной Осетии". Кӕцыдӕр кусджытӕн президенты барамындӕй радтой кадджын ном "Республикӕ Хуссар Ирыстоны ӕдасдзинады органты сгуыхт кусӕг".
