ЦХИНВАЛ, 14 янв - Sputnik. Хуссар Ирыстоны экономикон райрӕзты министрад чысыл ӕмӕ астӕуккаг бизнесӕн ӕххуысы программӕйы фӕлгӕтты консультаци кӕны амалиуӕггӕнджыты, кӕцыты фӕнды райсын уӕлбар кредит сӕ бизнесы райрӕзтӕн, хъусын кӕны хицауады пресс-службӕ.
Уӕлбар кредит райсыны фӕдыл конкурс расиддзысты парламент 2021 азы паддзахадон бюджет куы сфидар кӕна, уый фӕстӕ.
Амалиуӕггӕнджытӕн сӕ бон у бадзурын экономикон райрӕзты министрады амалиуӕгады райрӕзт ӕмӕ туризмы хайадмӕ, банысан кодтой уагдоны.
Премьер-министры х.ӕ. Бекъойты Геннадийы ныхӕстӕм гӕсгӕ, бизнес-консультациты формат у хорз фадат ӕрныхас кӕнын специалистимӕ фарстытыл, кӕцытӕ хауынц бизнес-проектмӕ.
Уӕлбар кредиткӕнынады фӕдыл закон райстӕуыд 2018 азы марты, йӕ руаджы хъуамӕ аскъуыддзаг кӕной цалдӕр социалон проблемӕйы.
