Зынгæ ирон фыссæг æмæ ахуыргонд Джусойты Нафийæн йæхи сæрмагонд бынат кæй ис ирон литературæйы, уый бæлвырд у. Хъазиты Мелитоны хъуыдымæ гæсгæ, Нафийæн никæимæ ис абарæн æмæ йæ нæдæр хъæуы барын.
"Нафи литературæмæ куы æрбацыд, уæд уыд цæттæ, æрмæст цы загътаит уымæй нæ, фæлæ поэтикон æгъдауæй дæр. Æмдзæвгæтæ фыста фыццаг, æмæ æмдзæвгæ куыд аразын хъæуы, цахæм ритмикæ æмæ нывæфтыдон миниуджытæ дзы хъуамæ уа, уыдон зыдта хорз", - банысан кодта Мелитон Резойы фырт.
Хъазиты Мелитоны ныхæстæм гæсгæ, Нафи йæ куыст хорз кæй зыдта, уый йын фадат радта, цæмæй йе 'сфæлдыстад æвæрццагæй бандæвтаид ирон литературæ æмæ поэзийы райрæзтыл.
"Нафийы барын никæимæ хъæуы, никæимæ дæр ын ис абарæн, уымæн ис йæхи стыр бынат ирон нывæфтыд литературæйы", - бафиппайдта фыссæг.
Хъазиты Мелитон ма куыд банысан кодта, уымæ гæсгæ Нафи скъолайы программæйы фæзынд, йæ роман "Фыдæлты туг" 1964 азы мыхуыргонд куы æрцыд, уæд. Уый бахахх кодта, уыцы историон æмгъуыдыл тынг цъус æрмæг кæй æрцыд фыст, уымæ гæсгæ Нафийы чиныг уыд стыр фæзынд литературæйы.
