ЦХИНВАЛ, 1 апр — Sputnik, Хъуылымбегты Азӕмӕт. Хуссар Ирыстоны Знауыры поселочы азы кӕронмӕ сцӕттӕ уыдзӕн ноджы иу муниципалон хӕдзар, фехъусын кодта Sputnik Беппиты Инал - фирмӕ "Престиж"-ы разамонӕг, кӕцы аразы бӕстыхай.
Знауыры райцентры 18-фатерон хӕдзары арӕзтад ӕххӕст цӕуы 2020-2022 ӕзтӕн Инвестпрограммӕйы фӕлгӕтты. Ныридӕгӕн ӕртӕуӕладзыгон корпусы куыстытӕ сты сӕ тӕмӕны.
"Электрохахх бауагътам, фӕуд кӕнӕм къултӕ сӕрдын, ӕвӕрӕм сантехникӕ. Тагъд рӕстӕджы фӕуыдзыстӕм хъармгӕнӕн системӕйы монтаж дӕр", - загъта Беппиты Инал.
Йӕ ныхӕстӕм гӕсгӕ, къуысты ницы къуыхцыдзинӕдтыл ӕмбӕлынц, финанскӕнынад дӕр цӕуы афоныл. Арӕзтадон ӕрмӕджыты фылдӕр хай ныридӕгӕн ис бынаты.
Сфидаргонд ӕмгъуыдтӕм гӕсгӕ, ӕртӕуӕладзыгон корпус, цы ран уыдзӕн дыууадӕс 2-хатӕнон ӕмӕ ӕхсӕз 3-хатӕнон фӕхуыздӕргонд планировкӕимӕ фатерты, эксплуатацимӕ лӕвӕрд ӕрцӕудзӕн ацы азы кӕрӕттӕм. Фӕлӕ куыстыты темптӕм гӕсгӕйӕ, арӕзтад хъуамӕ фӕуа тагъддӕр.
Бӕстыхайы кӕрты ма, Беппиты лӕппуйы ныхӕстӕм гӕсгӕ, сараздзысты улӕфӕн зонӕ бандӕттимӕ, сывӕллӕтты фӕзуат ӕмӕ хӕдтулгӕтӕн лӕууӕн бынат.
Арӕзтадӕн рахицӕнгонд ӕрцыд 60 милуан сомы.
Иу ахӕм хӕдзар ма Знауыры районы сарӕзтой фарон дӕр. Ноджы ма иу бирӕуӕладзыгон хӕдзар райцентры хъавынц саразынмӕ ӕввахс ӕртӕ азы.
