ЦХИНВАЛ, 27 май — Sputnik, Хъуылымбегты Азæмæт. Цхинвалы ацæудзæн Хуссар Ирыстоны хæдбардзинады акт расидыны боны цытæн æхсæнадæмон турнир уæлыстол теннисæй, фехъусын кодта Sputnik спорты ацы хуызы федерацийы хистæр Джиоты Мириан.
Гуырахстджын мадзал райдайдзæн 29 майы сывæллæтты Республикон спортивон скъолайы бæстыхайы.
"Турниры хайад райсдзысты бынæттон спортсментæ, стæй ма Ростов, Цæгат Ирыстон æмæ Абхазы теннистисттæ. Мадзал цæуы ныр æвдæм аз", - загъта федерацийы хистæр.
Уый ма бафтыдта, æхсæнадæмон спортивон мадзалæн хатдзæгтæ кӕй скæндзысты хуыцаубоны, 30 майы.
Ерыстæм цытджын уазджыты хуызы хуынд цæуынц, 29 азы размæ Республикæйы хæдбардзинады фæдыл ахсджиаг фæндон цы депутаттæ рахастой, уыдон.
Хуссар Ирыстоны хæдбардзинады акт фидар æрцыд 1992 азы 29 майы. Уый нымад цæуы республикæйы ног историйы иууыл ахсджиагдæр документыл.
