ЦХИНВАЛ, 18 июн — Sputnik, Плиты Фатимæ. Фӕсивӕдон политикӕ ӕмӕ спорты фӕдыл комитет аргъæвта конкурс "Сӕрмагонд стиль"-ы æмгъуыд. Хуыздӕр публикаци, фотоӕрмӕг ӕмӕ социалон видеороликтæ ист цæудзысты 19 июльмæ, фехъусын кодта Sputnik уагдоны пресс-секретарь Софа Исаакян.
"Фæсивæдæн сæ хъусдард рауагъдон æмæ бахизæн фæлварæнтæм здæхт кæй у, уымæ гæсгæ сæхи активон нæ дарынц, æмæ мах аскъуыддзаг кодтам аргъæвын йе ʻмгъуыд 19 июльмæ", - загъта Софа Исаакян.
Уымæй размæ уагдон фехъусын кодта, конкурс "Сӕрмагонд стиль"-ы кæй фæзынд ивындзинæтæ. Фæсивæдæн æнхъарынц æрмæг бавдисын экологийы проблемæтæ æмæ горæты æддаг бакаст бахъахъхъæныны тыххæй.
Конкурсы хайад райсыны бар ис куыд ӕвзонг журналисттӕн, афтӕ фӕсивӕды минӕвӕрттӕн дӕр, горӕт ӕмӕ районты скъолаты ахуырдзаутӕн, студенттӕн. Жюрийы сконд нырма арӕзт цӕуы. Уыдон уыдзысты ДИФ-ты минӕвӕрттӕ, адӕм, кӕцытӕ ахаст дарынц журналистикӕ, къамисын ӕмӕ операторон дӕсниадмӕ.
Конкурсы уӕлахиздзауты схорзӕхджын кӕндзысты фыццаг, дыккаг ӕмӕ ӕртыккаг къӕпхӕны дипломтӕй, лӕвӕрттӕй, грамотатӕй ӕмӕ призтӕй. "Сӕрмагонд стиль" конкурсы гран-при ратдзысты иууыл курдиатджын хайадисӕгӕн.
