ЦХИНВАЛ, 20 июн — Sputnik, Плиты Фатимӕ. Хуссар Ирыстоны велосипедистты къорд "Крути педали" фæнд кæны басæттын Кавказы хохæфцæг велосипедтыл. Спортуарзджытæ рабалц кæндзысты Цæгат Ирыстонæй Хуссар Ирмæ, фехъусын кодта Sputnik мадзалы организатортӕй иу, къахдзоныгъты Федерацийы разамонӕг Тедеты Лери.
Велосипедисттæ цалынмæ вазыгджын маршрутыл абалц кæной, уæдмæ уал сфæлвардзысты сæхи Цхинвалы район æмæ Къуыдаргоммæ.
"Къостайы хъæуы фæстæ та къаддӕр нымӕцӕй, фӕлӕ фӕразондӕр ӕмӕ фӕлтӕрдджындӕр велосипедисттимӕ абалц кӕндзыстӕм Къуайсамӕ", - дзуры ныхасӕмбал.
Къорд "Крути педали" ныр дӕргъвӕтин рӕстӕг фӕнд кӕны Цӕгат Ирыстонӕй Хуссармӕ ӕрцӕуын. Ивгъуыд аз уый ныффӕстиад ис пандемийы аххосӕй, фӕлӕ йӕ ацы аз фӕнд кӕнынц сӕххӕст кӕнын.
"Нырма уал бынаты фӕлтӕрддзинад райсдзыстӕм, стӕй та нӕхи срӕвдз кӕндзыстӕм Кавказы хохӕфцӕг басӕттын - рцӕудзыстӕм Цӕгат Ирыстонӕй Хуссармӕ. Нæ нывæзт ныр дæр цæттæ цæуы, уыд мын фембæлд Цæгат Ирыстоны велосипедисттимæ, уыдон мах рахизын кæндзысты таможнæйы онг",- балхынцъ кодта уый.
