ЦХИНВАЛ, 16 авг - Sputnik, Хъуылымбегты Зӕлинӕ. Хуссар Ирыстоны ивгъуыд майрӕмбоны бӕрӕггӕнӕнтӕм гӕсгӕ коронавирус сбӕрӕг кодтой 27 адӕймагӕн, фехъусын кодта Sputnik республикӕйы сӕйраг санитарон дохтыр Коцты Марина.
"Ивгъуыд майрӕмбоны Югосетпотребнадзоры ПЦР-лабораторийы сарӕзтой 208 тесты, уыдонӕй 27 радтой ӕвӕрццаг фӕстиуӕг. Иу суткӕмӕ медицинон хыгъдӕй систой 15 адӕймаджы. Дохтырты хъусдарды бын ма сты республикӕйы 726 цӕрӕджы", - загъта Коцты Марина.
Уый банысан кодта, сабат ӕмӕ хуыцаубоны цӕстдардон уагдоны ПЦР-лабораторийы кӕй нӕ арӕзтой иртӕстытӕ, къуырисӕры саразгӕ тестты фӕстиуджытӕ та бӕрӕг уыдзысты дыццӕджы райсоммӕ.
Хуссар Иры пандемийы райдайӕнӕй COVID-19 раиртасыны тыххӕй сарӕзтӕуыд 30855 иртӕсты, уыдонӕй ӕвӕрццаг фӕстиуӕг равдыстой 4606. Медикты хъусдардӕй ссистӕуыд 3880 пациенты.
