Иу комӕй - 400 фӕмардуӕвӕджы: Уелиты цӕрӕг хъӕуы СФХ хъайтарты цырты тыххӕй

Иу комӕй - 400 фӕмардуӕвӕджы: Уӕлиты цӕрӕг хъӕуы СФХ хъайтарты цырты тыххӕй
Рафыссын
Знауыры район Уелиты хъӕуы административон бӕстыхайы террриторийыл 1972 азы 9 майы сӕвӕрдтой цырт, Стыр Фыдыбӕстон хӕстӕй цы фӕсивӕд нал ӕрыздӕхт, уыдонӕн. Хъӕуы цӕрӕг Хуыбецты Владимир куыд радзырдта, уымӕ гӕсгӕ уӕды рӕстӕджы цырт сӕвӕрыны инициативӕ фӕзынд историон зондӕдты кандидат Цхуырбаты Иванмӕ.
"Уӕд ӕз уыдтӕн фӕскомцӕдисы секретарь ӕмӕ мӕ Иванмӕ сфидар кодтой. Уый-иу райсомӕй ӕрцыд горӕтӕй автобусыл ӕмӕ физикон куыст дӕр кодта, мах та йын ӕххуыс кодтам", - загъта Владимир.
Хъӕуы цӕрӕджы ныхӕстӕм гӕсгӕ, цыртдзӕвӕны скульптор уыд Чилӕхсаты Владимир. Хъӕуы фӕсивӕд активон хайад райстой ацы цырт аразыны хъуыддаджы. Цыртдзӕвӕны хыгъды ис 400 адӕймаджы.
"Цыртдзӕвӕны хыгъдмӕ хаст ӕрцыдысты, хӕстӕй чи нал ӕрыздӕхт, уыцы фӕсивӕд. Зӕгъӕм Хубежты Михайы лӕппутӕ уыдысты фондзӕй, иу дӕр дзы нал ӕрыздӕхт хӕдзармӕ", - бафиппайдта Хуыбецты Владимир.
Уый ма куыд банысан кодта, уымӕ гӕсгӕ ӕрвылаз дӕр Уӕлахизы бон цырты цурмӕ ӕрбатымбыл вӕййынц хъӕуы адӕм ӕмӕ ӕрымысынц уыцы ӕвзонг ӕфсӕддонты рухс ном.
Ног хабӕртты лентӕ
0