Хуссар Иры фæстаг хæрзбон загътой Пухаты Нодарæн
© Sputnik / Элина Габараева
Рафыссын
ЦХИНВАЛ, 15 авг — Sputnik, Гæбæраты Элина. Цхинвалы фæстаг хæрзбон загътой культурæйы сгуыхт кусæг, паддзахадон эстрадон ансамбль "Мемориал"-ы директор Пухаты Нодарæн (Пухъе). Сæ зондамонæджы афæндараст кæнынмæ æрбацыдысты йæ ахуыргæнинæгтæй бирæтæ – бынæттон эстрадæйы стъалытæ, æмгæрттæ æмæ хиуæттæ.
Фыдохы митингмæ æрбацыдысты республикæйы къухдариуæгады минæвæрттæ дæр президент Гаглойты Аланы сæргълæудæй.
Хуссар Иры фæстаг хæрзбон загътой Пухаты Нодарæн
© Пресс-служба президента РЮО
"Хуссар Ирыстоны культурæйы къабазыл æрцыд стыр зиæнттæ – дыууæ ирд минæвары ахицæн сты сæ цæрдтæй – цалдæр боны размæ афæндараст кодтам Беппиты Изольдайы, ныр та Нодары. Цхинвалы, æвæццæгæн нæй ахæм адæм, кæцытæ йæ нæ зыдтой. Нодар цард йæ куыстæй, уыд ын бæллиц, цæмæй эстрадон культурæ рахиза ног æмвæзадмæ", - радзырдта театры аивадон куъхдариуæггæнæг Дзудцаты Тамерлан.
Республикæйы адæмон артист Харебаты Вадим банысан кодта, Хуссар Ирыстоны нырма бирæ кæй хъуыды кæндзысты Пухаты Нодары.
Хуссар Иры фæстаг хæрзбон загътой Пухаты Нодарæн
© Пресс-служба президента РЮО
"Мах базонгæ стæм, "Бонвæрнон"-мæ куы æрбацыд, уæд. Чысыл фæстæдæр ссис къорды администратор. Мах Нодаримæ æрзылдыстæм æппæт Советон Цæдисыл, уыдыстæм йæ алæмæттаг къуымты концерттимæ", - бахахх кодта Харебаты Вадим.
Афтæ ма уый банысан кодта, Пухаты Нодар кæй уыд æрмæст профессионал нæ, фæлæ ма иузæрдыг æмгар, хорз адæймаг.
"Цыфæнды зын рæстæг дæр Нодар агуырдта фадат ссарын аппаратурæ æмæ сорганизаци кæнын концерт. Фæстæдæр уый бакодта йæхи студи, цы ран дæтта сывæллæттæн фадат равдисын сæхи. Нæ эстрадæйы стъалытæ иууылдæр сты йæ ахуыргæнинæгтæ. Бузныг дын, Нодар, цыдæрридæр сарæзтай, уый тыххæй", - бафтыдта уый.
Пухаты Нодарæн фæстаг хæрзбон загътой дæргъвæтин къухæмдзæгъдæй.
Хуссар Иры фæстаг хæрзбон загътой Пухаты Нодарæн
© Sputnik / Элина Габараева
