ЦХИНВАЛ, 11 фев - Sputnik. Хуссар Ирыстоны ивгъуыд къуыри ӕрцыд иу фыдракӕнд, кӕцы сбӕрӕг кодтой барадхъахъхъӕнӕг органты кусджытӕ. Афтӕ ма ацы период республикӕйы фӕндӕгтыл ӕрцыд иу фӕндагон-транспортон цау (ФТЦ), кӕцыйы фӕстиуӕгӕн зианбаййафджытӕ нӕй, хъусын кӕны къуырисӕры Хуссар Ирыстоны Мидхъуыддӕгты министрады (МХМ) пресс-службӕ.
"Республикӕмӕ ӕууилгӕ тамако "снюс" ласыны тыххӕй Дзауы районы тӕрхондон фӕивар кодта иу ӕмбӕстаджы 20 мин сомы бӕрц", - дзырдӕуы хъусинаджы.
Рейдты рӕстӕджы Паддзахадон автоинспекцийы кусджытӕ сбӕрӕг кодтой фӕндагон змӕлды 245 фӕткхалды, 11 шофыры скъӕрдтой хӕдтулгӕ нозтджынӕй.
МХМ информацимӕ гӕсгӕ, Цхинвалы милицийы кусджытӕ ӕхсӕнадон фӕткы алыгъуызон фехӕлдты тыххӕй ӕрбакодтой горӕты мидхъуыддӕгты хайадмӕ ӕхсӕз адӕймаджы. Столицӕйы тӕрхондон уыдонӕй иуы фӕивар кодта иу мин сомы, аннӕйы та сбадын кодтой ахӕстоны 10 суткӕмӕ.
