ЦХИНВАЛ, 10 июл - Sputnik. Хуссар Ирыстоны Мидхъуыддӕгты министрад (МХМ) ӕмӕ Уӕлвӕткон уавӕрты министрады (УУМ) кусджытӕ ӕрвылбон уадзынц иумӕйаг рейдтӕ республикӕйы районты улӕфӕн бынтӕтты.
Республикӕйы МХМ пресс-службӕ фехъусын кодта, рейдтӕ кӕй ауагътой Ленингоры районы. Милицийы кусджытӕ ӕмӕ ирвӕзынгӕнджытӕ радзырдтой улӕфджытӕн ӕдасдзинады мадзӕлтты тыххӕй найыны рӕстӕджы, афтӕ ма сӕ бафӕдзӕхстой, цӕмӕй ӕрдз ма чъиззи кӕной, ӕхсӕнадон фӕтк ма халой ӕмӕ арт ма кӕной хъӕды цур.
"Ӕхсӕнадон фӕткхалджыты ӕрбаздахдзысты административон бӕрнмӕ", - фехъусын кодтой пресс-службӕйы.
Афтӕ ма милицийы кусджытӕ ӕрсидтысты ныййарджытӕм, цӕмӕй ма уадзой сӕ сывӕллӕтты донмӕ иунӕгӕй.
Профилактикон куыст адаргъ уыдзӕн найыны сезоны фӕудмӕ, бафтыдтой МХМ.