ЦХИНВАЛ, 4 сен – Sputnik, Козаты Диана. Хуссар Ирыстоны парламенты депутаттӕ бабæрæг кодтой республикӕйы Дзауы районы Синагуры хъӕуы районы уавӕр, цы ран гуырдзиаг фарс аразы ноджы иу пост, фехъусын кодта Sputnik телефонӕй депутат Дьяконты Амиран, кӕцы ис арӕны районы.
Синагуры хъӕумӕ балцы тыххӕй депутаттӕ ӕртыццӕджы аивтой комитетты рабадт, кӕцыйы рӕстӕджы хъуамӕ ӕрныхас кодтаиккой республикӕйы Уисты (Цънелис) хъӕуы районы паддзахадон арӕны уавӕрыл.
"Уыдонӕн Хуыцау нӕй. Уыдон аскъуыддзаг кодтой саразын сӕ пост не 'мбӕстӕгты стджытыл, кӕцытӕ фесты зӕххын бын зӕххӕнкъуысты рӕстӕджы Хахеты", - загъта депутат.
Зӕххӕнкъуыст ӕрцыд 1991 азы, уый фӕстиуӕгӕн зӕххы бын фӕцис Хахеты хъӕу йӕ цӕрджытимӕ иумӕ (трагедийы бынат ис Синагурӕй иу километр дарддӕр). Ӕрдзон бӕллӕхы фӕмард сты 57 адӕймаджы, кӕцыты хсӕн уыдысты скъола-интернаты хъомылгӕнинӕгтӕ.
Депутаттӕ аскъуыддзаг кодтой бынаты фенын уавӕр ӕмӕ базонын, цы ран уагъд цӕуы паддзахадон арӕн Хуссар Ирыстон ӕмӕ Гуырдзыстоны хсӕн.
Августы кӕрӕтты республикӕйы Паддзахадон ӕдасдзинады комитет (ПӔК) фехъусын кодта, Гуырдзыстоны полици кӕй райдыдта аразын пост Дзауы районы Синагуры хъӕуы цур.
Уагдоны информацимӕ гӕсгӕ, посты уыдзӕн цӕрӕн вагонтӕ дӕр. Афтӕ ма Гуырдзыстоны къухдариуӕгад нывӕнды сцалцӕг кӕнын фӕндаг, кӕцы иу кӕны Гуырдзыстоны полицийы пост гуырдзиаг арӕнгӕрон цӕрӕг пункт Переуимӕ.
