ЦХИНВАЛ, 30 дек - Sputnik, Плиты Фатимæ. Ног азы къæсæрыл балхынцъ ис ПТРК "Ир"-ы телеуынынадон конкурс "Кафт" комкоммæ эфиры. Конкурсы уæлахиздзау ссис Хуыгаты Дианайы хъомылгæнинаг Джиоты Вадим. Лæппу равдыста иттæг хорз техникон цæттæдзинад национ хореографийы, фехъусын кодта Sputnik проекты автортӕй иу Мамиты Григорий.
Проекты фæлгæтты сывӕллӕттимӕ куыстой паддзахадон ансамбль "Симд"-ы архайгæ æмæ раздæры кусджытӕ Хуыгаты Диана, Санахъоты Жанна ӕмӕ Чилӕхсаты Георгий. Алкæцы амонæгæн дæр финалмæ ахызт иу кафæг. Дыккаг призер ссис Чилӕхсаты Георгийы ахуырдзау Зассеты Вадим æмæ æртыккаг та Санахъоты Жаннайы къорды уæнг Гæззаты Арсен.
"Ӕртæ лæппуйæ уыдысты финалы – иттæг хорз кафджытæ. Фæлæ уæддæр се ʻхсæн хуыздæр разынд Джиоты Вадим, уый йæ номыры равдыста, ирон кафт цæмæй хъæздыг у, уыдон иууылдæр, акафыд хъаматимæ дæр, стæй йæ хорз радæтта актерон æгъдауæй дæр", - загъта Мамиты Григорий.
Уый ма радзырдта, зæгъгæ, проект кæд ныббиноныг уа, уæд æй азæй-аз хуыздæр араздзысты.
"Фыццаг фæлварæн у. Хорз рауад проект, фæлæ йæ дыккаг хатт сардзыстæм ноджы хуыздæр, кæд ын хицæн æрцæуа фæрæзтæ, уæд. Тынг бирæ адæм дзурынц, кæй сæ фæндыд хайад райсын, фæлæ йæ афоныл нæ базыдтой", - бафтыдта уый.
Телеуынынадон конкурс "Кафт" райдыдта Хуссар Ирыстоны иу мӕййæ фылдæры размӕ, сӕ курдиат равдисын бафӕлвӕрдтой сӕдӕ адӕймагӕй фылдӕр.
Иууыл хуыздӕр кафӕгæн организатортæ радтой приз – 100 мин сомы, дыккаг бынаты хицауæн 50 мин сертификат радта Дзулфыцæн комбинат æмæ æртыккаг бынаты хицауæн та арæзтады управлени радта 30 мин сомы.
Жюрийы сконды уыдысты зындгонд хореографтӕ Хуссар Иры – Ӕлборты Гемир, Быценты Геннадий, Тедеты Валентина ӕмӕ Медея Гугутишвили.
Телеуынынадон конкурс реализаци цӕуы националон телеуынынады базӕйыл, проекты автортӕ сты Бестауты Юлия ӕмӕ Мамиты Григорий.
