ЦХИНВАЛ, 22 окт — Sputnik, Плиты Фатимæ. Хуссар Ирыстоны паддзахадон телеуынынад хоны арæхстджын кафджыты сфæлдыстадон проект "Кафт"-ы хайадистмæ. Национ телеуынынады эфиры алæвæрд фæзындзæн ног мæйы, фехъусын кодта Sputnik проекты организатор Мамиты Григорий.
Алæвæрды архайыны фадат ис профессионалон æмæ хæдахуыр кафджытæн æнæ кары арæнæвæрдæй.
"Алкæмæн дæр бар ис рахизын сценæмæ, равдисын сæ курдиат, харизмæ, энерги æмæ æнæмæнг национ хореографи. Куырдиæттæ ныр дæр ист цæуынц, бирæ адæмы фæнды хайад райсын, сæ нымæцы паддзахадон æмæ адæмон ансамбльты артисттæ, районты цæрджытæ æмæ арæхстджын кафджытæ", - загъта Мамиты Григорий.
Проектмæ æвзæрстытæ цæудзысты 1-2 ноябры.
"Ацы дыууæ бон сфидар кæндзыстæм, проектмæ чи бахиздзæн, уыдон номхыгъдтæ. Фыццаг æртæ эфиры дæр уыдзæн æвзарæн. Сæ арæхстдзинадæн сын аргъ кæндзæн сæрмагонд жюри", - бафтыдта уый.
Телеуынынадон проекты уæлахиздзау райсдзæн 100 мин сомы.
