ЦХИНВАЛ, 27 мар - Sputnik, Козаты Диана. Хуссар Ирыстоны ахуырадон уагдӕтты карантин адарддӕр кодтой апрелы ӕмбисы онг. Инормаци сфидар кодтой Югосетпотребнадзоры.
Республикӕйы ахуырадон уагдӕттӕ сӕхгӕдтой карантиныл 18 марты коронавирусы ныхмӕ мадзӕлттӕ райсыны фӕдыл. Хуссар Ирыстоны цыппӕрӕмӕй фӕстӕмӕ тобӕ сӕвӕрдтой культурон-массон ӕмӕ спортивон мадзӕлттӕ уадзыныл дӕр.
"Хуссар Ирыстоны карантин адарддӕр кодтой 15 апрелы онг", - загътой сӕйраг санитарон уагдоны.
Цыппӕрӕмы карантинон мадзӕлттӕ фӕтыхджындӕр кӕныныл ӕрдзырдтой республикӕйы парламенты дӕр. Вице-спикер Гасситы Петры ныхӕстӕм гӕсгӕ, республикӕйы хъӕуы расидын дӕс боны дӕргъӕн иумӕйаг карантин.
Депутаттӕ бадзырдтой, кӕй бацӕттӕ кӕндзысты бадзырд хицауадмӕ карантинон мадзӕлттӕ фӕтыхджындӕр кӕныны фӕдыл.
Знон республикӕйы ауагътой коронавирус сбӕрӕг кӕныны фӕдыл фыццаг тесттӕ. Вирус никӕмӕ сбӕрӕг кодтой.
Амӕйразмӕ Хуссар Ирыстоны тобæ сæвæрдтой фæсарæйнаг æмбæстæгтæн республикæйы территоримæ æрбахизыныл, арæнæвæрд нæ хауы æрмæстдæр уæрæсейæгтæм, афтӕ ма сӕхгӕдтой уадзӕн пункттӕ Гуырдзыстонимӕ паддзахадон арӕныл.
