ЦХИНВАЛ, 15 июн - Sputnik, Плиты Фатимӕ. Хуссар Ирыстоны ацы къуыри бынӕттон базармӕ рауадздзысты минералон хосгӕнӕн дон "Аландон". Амалиуӕгады бардарӕг йӕ продукци фӕнд кӕны ДАР ӕмӕ Уӕрӕсейы базармӕ ласын, коронавирусы фӕдыл уавӕр куы ӕрнывыл уа, уӕд.
Минералон дон "Аландон" арӕзт цӕуы Згъубиры донгуырӕнӕй. Ацы дон 2018 азы ӕндӕр маркӕйы бын Уӕрӕсейы равдыст "Продэкспо"-йы нымад ӕрцыд хуыздӕр продуктыл ӕмӕ райста сызгъӕрин майдан.
"Дӕргъвӕтин фӕстиаты фӕстӕ ацы къуыри компани "Атей" сног кодта донрауагъдад маркӕ "Аландон"-ы бын. Ног ифтонгад фадат дӕтты хуыздӕр гъӕды ӕмӕ продукцийы стырдӕр гуырахст уадзӕн. Иу сахаты лини дӕтты 6 мин авджы дон", - загъта Sputnik заводы хистӕр Босыкты Олег.
Йӕ ныхӕстӕм гӕсгӕ, фыццаг уал дон уыдзӕн бынӕттон базары, уый фӕстӕ та бацархайдзысты фӕсарӕйнаг уӕлтӕрхджытӕм бавдисын сӕ продукци.
"Коронавирусы фӕдыл тобӕйы мадзӕлттӕ фӕстиат кӕнынц нӕ рахызт фӕсарӕйнаг базармӕ. Развӕлгъау бадзырдтӕ нын ис Донецкаг республикӕ ӕмӕ Уӕрӕсеимӕ", - бафтыдты заводы хистӕр.
Згъубиры суадон, кӕцыйӕ уадзынц "Аландон", ис Дзауы районы. Уӕрӕсейаг курортологийы зонад-иртасӕн институты ахуыртӕм гӕсгӕ, минералон дон ахъаз у кӕцыдӕр низтӕн хос кӕнынӕн. Ацы донгуырӕнӕй хицӕн ӕзты уагъд цыд продукци ахӕм маркӕты бын, куыд "Суар", "Осетиан" ӕмӕ "Аландон".
