ЦХИНВАЛ, 1 фев — Sputnik. Хуссар Ирыстоны фӕсарӕйнаг хъуыддӕгты министр (ФХМ) Медойты Дмитрий хайад райста Науруйы хӕдбардзинадыл 50 азы сӕххӕсты бӕрӕгбоны, кӕцы нысан цыд ӕртыццӕджы, 31 январы, хъусын кӕны РХИ ӕддагполитикон ведомствӕйы пресс-службӕ.
Цытджын мадзӕлтты официалон программӕ райдыдта Науруйы паддзахадон тырысайыл хӕрдмӕ схӕцыны церемонийӕ республикӕйы Кады зарӕджы зӕлтӕм. Церемони уагъд ӕрцыд Науруйы Хицауады хӕдзары размӕ фӕзуатыл.
Бӕрӕгбонон арфӕ ӕрӕмбыруӕвджытӕн ракодта Науруйы президент Барон Вака, уый фӕстӕ уагъд ӕрцыд полицийы ӕмӕ ӕндӕр сӕрмагонд дӕлхайӕдты парад, Науруйы цӕрджыты, скъоладзауты, спортсменты, афтӕ ма сакъадахы цы знӕмтӕ ис, уыдон минӕвӕртты рацыд.
Изӕры та бӕрӕгбоны цытӕн ацыд цытджын райст республикӕйы сӕргълӕууӕджы номӕй. Мадзӕлттӕ адарддӕр сты фейерверк ӕмӕ адӕмон хъӕзтытӕй.