ЦХИНВАЛ, 8 май — Sputnik, Плиты Фатимæ. Цхинвалы Хъайтарты аллейыл Ӕнусон артмæ дыццæджы сӕвӕрдтой Кады гирляндӕ. Рог къæвдамæ æнæкæсгæйæ, сæдæгай цæрджытæ тыгуыртæй цыдысты дидинтимæ мемориалмæ.
Церемони уагъд ӕрцыд Стыр Уæлахизыл 73 азы сæххæсты цытæн мадзæлтты фæлгæтты. Æнусон арты цур иу уысм æдзæмæй алæугæйæ ссардтой хæсты амæттæгты рухс нæмттæ. Æрæмбырдуæвджыты раз раныхас кодта президент Бибылты Анатолий.
"9 май æрвылаз мах нысан кæнæм сæрыстырæй — нæ фыдæлтæ бахъахъхъæдтой стыр, номдзыд бæстæ – Советон цæдис. Уыцы фæлтæр дунейæн равдыстой хъæбатырдзинады æмæ райгуырæн бæстæм уарзондзинады дæнцæг. Уыдон цæвиттоныл хъомыл кодтам мах", — банысан кодта паддзахады сæргълæууæг.
Æрæмбырдуæвжыты раз æфсæддон темæйыл æмдзæвгæ радзырдта гимнази "Альбион"-ы ахуырдзау.
Мадзалы фæстæ митинджы архайджытæ ацыдысты Стыр Уæлахизæн нывонд солдатон бонасадæнмæ Ногдзауты паркмæ.
Стыр Фыдыбӕстӕйон хӕсты Уæлахизыл 73 азы сæххæсты мадзæлтты фæлгæтты æртыццæджы Цхинвалы Театралон фæзуаты ацæудзæн парад.
Фронтмӕ Хуссар Ирыстонӕй ацыд цӕрджыты ӕртыккаг хай — 20 мин адӕймагӕй фылдӕр. Хӕсты быдыры фӕмард ис 11 мин адӕймагӕй фылдӕр, 7 мин адӕймаджы хъысмӕт та абон дӕр бӕрӕг нӕу.