ЦХИНВАЛ, 17 авг — Sputnik, Уалыты Диана. Цхинвалы ацыд кафты изæр, кæцы бацæттæ кодта горæты администрацийы спорт, культурæ æмæ фæсивæдон политикæйы фæдыл хайад. Хъæлдзæг изæр æрæмбырд кодта горæты сывæллæттæ æмæ фæсивæды.
Изæры фыццаг хай снывонд кодтой ирон хореографийæн, фæсивæд кафыдысты симд, хонгæ æмæ æндæр ирон кæфтытæ.
Горæты администрацийы культурæйы хайады хистæр Тасойты Игорь банысан кодта, ахæм мадзæлттæ хорзырдæм æндавынц республикæйы имиджыл.
"Ирон кафт кæнынц горæты цæрджытæ, профессионалон кафджытæ ам нæй. Махмæ уазæгуаты цæуы бирæ адæм, уадз æмæ феной ирон кафты рæсугъддзинад æмæ бамбарой, уый æрмæст сценæйæн нæу", — загъта уый.
Уый ма банысан кодта, адæмæн сæ куырдиатмæ гæсгæ изæр адарддæр кодта "Дискотека 80-х". Ирон эстрадæйы зарæггæнджытæ æххæст кодтой зындгонд зарджытæ. Изæры кæрон зæронд зарджыты раивтой нырыккон хиттæ. Фæсивæд ма бирæ рæстæг цæуынвæнд нæ кодтой.