ЦХИНВАЛ, 23 авг — Sputnik. Хуссар Ирыстоны хъахъхъӕнынады министрады делегацийы минӕвӕрттӕ министр Гассеты Ибрагимы сӕргълӕудӕй хайад исынц ӕхсӕнадӕмон форумты "Армия-2018" ӕмӕ "Неделя национальной безопасности"-йы, кӕцытӕ цӕуынц Мӕскуыгӕроны 21-26 августы, хъусын кӕны уагдоны пресс-службӕ.
Хуссарирыстойнаг делегацийы сконды сты РХИ хотыхджын тыхты генералон штабы хистӕр булкъон Виктор Федоров, хъахъхъӕнынады министрады ӕфсӕддон атташе Гассеты Таймураз ӕмӕ министры уынаффӕгӕнӕг барадон фарстыты фӕдыл майор Собайты Григорий.
"Армия-2018" форумы бӕрӕгбонон баконд сӕххӕст ис 21 августы. Уым хайад райстой Уӕрӕсейы хъахъхъӕнынады министр Сергей Шойгу ӕмӕ Мӕскуыйы областы губернатор Андрей Воробьев. Форумы хайадисджытӕн равдыстой УФ президент Владимир Путины видеобадзырд.
Мадзалы хайад исынц 1,2 мин куыстуат ӕмӕ организаци, кӕцытӕ бавдисдзысты 26 мин экспонатӕй фылдӕр.
Форумы фӕзуаттыл равдисдзысты аст фӕсарӕйнаг паддзахады националон экспозици: Сомих, Белорусси, Инди, Казахстан, Китай, Пакистан, Словаки ӕмӕ Турци.