ЦХИНВАЛ, 29 окт — Sputnik. Дин ӕмӕ ӕхсӕнады монон райрӕзт хъуамӕ цӕуой зонадон прогрессимӕ иумӕ, радзырдта йӕ интервьюйы Sputnik "Куырдалӕгон" фонды минӕвар Зӕгъойты Рустам.
IV Ӕхсӕнадон форум "Религия и мир: религия и цифровое общество" ацыд ацы бонты Мӕскуыйы МИА "Россия сегодня" пресс-центры. Форум ӕрӕмбырд кодта делегациты бирӕ бӕстӕтӕй: Греци, Сири, Ливан, Израиль, Серби ӕмӕ ӕндӕр бӕстӕтӕй. Фембӕлды хайад райста не 'мбӕстаг дӕр, национ-хӕрзаудӕн организаци "Куырдалӕгон"-ы минӕвар Зӕгъойты Рустам.
Форум у уникалон дискуссион фӕзуат, кӕцы ӕрӕмбырд кодта алыгъуызон динты минӕвӕртты.
"Уазджыты ӕхсӕн уыдысты Сирийы сӕйраг муфтий, чырыстон лидертӕ, дины архайджытӕ Израилӕй", — радзырдта Зӕгъойты Рустам.
Форумы рӕстӕджы делегаттӕ ӕрныхас кодтой иууыл карздӕр проблемӕтыл, сӕйраджыдӕр, радикалон дины уад. Афтӕ ма хайадисджытӕ ныхас кодтой традицион динты тыххӕй.
Сириаг муфтиимӕ базонгӕдзинад уыд уӕлдай аргъджын, бафтыдта Зӕгъойты Рустам.
"Уӕрӕсейаг фарс банхъардта саразын Сирийы пырх аргъуаны бынаты рӕстдинон аргъуан ӕмӕ уый фӕдыл муфтий загъта, зӕгъгӕ, дин хъуамӕ ма уа уӕлдӕр зонад ӕмӕ ӕндӕр царды уагтӕй. Ӕмӕ ӕз йемӕ разы дӕн: монон, зонадон ӕмӕ материалон райрӕзт хъуамӕ цӕуой иумӕ", — загъта Зӕгъойты Рустам.
Зӕгъойты Рустам бафтыдта, зӕгъгӕ, форумы иннӕ ӕмбырд уыдзӕн иннӕ аз. Ирыстоны минӕвӕрттӕ ацы хатт уыдзысты фылдӕр: фӕхондзысты делегатты куыд Цӕгат, афтӕ Хуссар Ирыстонӕй дӕр.