ЦХИНВАЛ, 23 янв — Sputnik, Козаты Диана. Сӕ райрӕзтимӕ проблемӕтӕ цы сывӕллӕттӕн ис, уыдонӕн февралы райдайӕны Цхинвалы бакӕндзысты коррекцион кълас хӕрзаудӕн фонд "Лӕвар базырты" бындурыл. Уый тыххӕй Sputnik фехъусын кодта организацийы къухдариуӕггӕнӕг Цхуырбаты Татьяна.
"Цхинвалы ма иу ахӕм кълас кусы ӕнтыстджынӕй скъола-интернаты бындурыл, фӕлӕ, уымӕ ӕнӕкӕсгӕйӕ, нӕ фондмӕ цыд бирӕ куырдиӕттӕ ныййарджытӕй бакӕнын сӕрмагонд кълас, сӕ райрӕзтимӕ проблемӕтӕ цы сывӕллӕттӕн ис, уыдонӕн, сӕйраджыдӕр, Дауны синдром ӕмӕ аутизмимӕ сабитӕн", - загъта уый.
Къласон хатӕн ӕмӕ улӕфӕн зонӕ ныридӕгӕн ифтонг сты ӕнӕмӕнгхъӕуӕг дзауматӕй хӕрзаудӕн фонды офисы.
"Фыццаг рӕстӕджыты уал кълас уыдзӕн нӕ фонды офисы. Сывӕллӕттимӕ кусдзӕн квалификацион психолог сӕрмагонд методикӕимӕ. Ахуыр фыццаг цӕудзысты индивидуалонӕй, стӕй сӕ ныддихтӕ кӕндзыстӕм къордтыл", - загъта фонды къухдариуӕггӕнӕг.
Цхуырбаты Татьяна загъта бузныг фонды спонсортӕн ӕмӕ банысан кодта, сабиты коррекцион къласмӕ ӕрбакӕныны фадат кӕй ис алкӕмӕн дӕр.