ЦХИНВАЛ, 25 фев - Sputnik. Хуссар Ирыстоны ивгъуыд къуыри ӕрцыд дыууӕ фӕндагон-транспортон цауы (ФТЦ), кӕцыты фӕстиуӕгӕн зиан баййӕфта иу адӕймаг, хъусын кӕны республикӕйы Мидхъуыддӕгты министрады (МХМ) пресс-службӕ.
"Рейдон мадзӕлтты рӕстӕджы Паддзахадон автоинспекцийы кусджытӕ сбӕрӕг кодтой фӕндагон змӕлды 203 фӕткхалды. Аст шофыры скъӕрдтой хӕдтулгӕтӕ нозтджынӕй", - дзырдӕуы хъусинаджы.
Уагдоны бафтыдтой, зӕгъгӕ, 18-25 февралы республикӕйы территорийыл не сбӕрӕг кодтой фыдракӕндтӕ. Алыгъуызон фӕткхӕлдты тыххӕй бӕрнмӕ ӕрбаздӕхтой цалдӕр адӕймаджы.
Хуссар Ирыстоны столицӕйы Цхинвалы районы мидхъуыддӕгты хайадмӕ ӕрбакодтой 9 фӕткхалӕджы. Уыдонӕй цыппары фӕивар кодтой фӕйнӕ иу мин сомы, иу ӕмбӕстаджы та сбадын кодтой ахӕстоны 15 суткӕмӕ.