ЦХИНВАЛ, 26 фев — Sputnik. Спортсментӕ Цӕгат Ирыстонӕй ӕнтыстджын архайд скодтой Цӕгат Кавказы федералон зылды (ЦКФЗ) чемпионаты кикбоксингӕй, хъусын кӕны республикӕйы спорты министрады пресс-службӕ.
Ерыстӕ цыдысты дагестайнаг Избербашы, ирон командӕ рамбылдта 10 хорзӕхы.
"Сӕ уӕзы категориты фыццаг бынӕттыл ацыдысты Танделаты Тамерлан (91 килограмм), Дыгъуызты Азӕмӕт (51 килограмм), Абайты Марат (67 килограмм) ӕмӕ Уалыты Тамерлан (67 килограмм юниорты ӕхсӕн). Даниил Седов (54 килограмм) ссис ӕвзист майданы хицау. Бронзӕйы хорзӕхтӕ райстой Сафар Азизов (60 килограмм), Бахъаты Роман (48 килограмм), Гобаты Георгий (51 килограмм), Касаты Зелим ( 81 килограмм) ӕмӕ Тотраты Феликс", - дзырдӕуы хъусинаджы.
Пресс-службӕйы бафтыдтой, зӕгъгӕ, спортсменты ерыстӕм бацӕттӕ кодтой тренертӕ Гӕбӕраты Олег, Хаситы Дмитрий, Михаил Весницкий, Василий Мельников, Къусраты Рамис ӕсӕ Гацоты Эльбрус.
Ерыстӕ уыдысты ӕвзарӕн Уӕрӕсейы чемпионатмӕ кикбоксингӕй, кӕцы ацӕудзӕн 8-14 апрелы Иркутскы.