ЦХИНВАЛ, 20 мар - Sputnik, Плиты Фатимӕ. Цхинвалы йе ʻнусон бынатмӕ афӕндараст кодтой адӕмон къамисӕг, Колыты Аксойы номыл аивӕдты лицейы ахуыргӕнӕг Гӕбӕраты Неллийы. Сталины уынгыл бирӕуӕладзыгон хӕдзары кӕрты, цы ран цард зындгонд сылгоймаг, азмӕлӕн нал уыд адӕм ӕмӕ дидинтӕй.
Сӕдӕгай адӕймӕгтӕ – ахуырдзаутӕ, политиктӕ, ӕхсӕнад ӕмӕ сфӕлдыстадон интеллигенцийы минӕвӕрттӕ ӕрбацыдысты хъӕлдзӕг, ирд ӕмӕ цардуарзӕг сылгоймагӕн фӕстаг хӕрзбон зӕгъынмӕ.
Ахуыргӕнӕг ӕмӕ къамисӕджы ирд цард ӕмӕ сгуыхтдзинӕдтыл дзырдтой мыггаджы ӕмӕ ӕхсӕнады минӕвӕрттӕ, бакастысты Гӕбӕраты Неллийӕн нывонд ӕмдзӕвгӕтӕ.
Хуссар Ирыстоны ахӕм адӕймаг нӕ баззад, кӕцы нӕ зыдта Неллийы. Дӕс азы дӕргъы Нелли социалон хызӕгты ныммыхуыр кодта мингай къамтӕ. Йӕ куыстытӕ уыдысты Хуссар Иры ӕппӕт конкурсты уӕлахиздзауты нымӕцы. Ӕппӕт нысаниуӕгджын мадзӕлттӕм уый хӕццӕ кодта профессионалон журналисттӕй ӕмӕ фотографтӕй раздӕр.
Йӕ чысыл нывисӕнимӕ Неллийы фенӕн уыдис горӕты куыд сӕумӕрайсом, афтӕ талынгты дӕр. Цхинвайлаг нывисӕджы цӕстӕнгасӕй сӕ райгуырӕн зӕххыл цы ивындзинӕдтӕ цӕуы, уыдон уыдтой Хуссар Иры бынӕттон цӕрджытӕ ӕмӕ ардыгӕй ацӕугӕ адӕм дӕр.
Адӕмон къамисӕг йӕ цардӕй ахицӕн хуыцаубоны 62 азы кары. Баззад ын чызг ӕмӕ зӕнӕджы зӕнӕг. Гӕбӕраты Неллийы бавӕрдтой Згъудеры уӕлмӕрды.