ЦХИНВАЛ, 22 мар - Sputnik. Цхинвалы ӕхсӕзӕм скъолайы сорганизаци кодтой Поэзийы ӕппӕтдунейон бонӕн нывонд "Пушкины бал", кӕцы нысан кӕнынц 21 марты. Мадзал бацӕттӕ кодтой скъолайы ахуыргӕнджытӕ ӕмӕ ахуыргӕнинӕгтӕ ӕмӕ йӕ снывонд кодтой Александр Пушкинӕн, уый тыххӕй ӕмӕ ацы аз нысан кӕнынц номдзыд уӕрӕсейаг поэты райгуырдыл 220 азы сӕххӕст, хъусын кӕны Россотрудничествойы минӕварады пресс-службӕ.
"Цхинвалы "Пушкины бал" ауадзыны инициатор у Хуссар Ирыстоны уырыссаг ӕвзаг ӕмӕ литературӕйы ахуыргӕнджыты ассоциацийы президент Тедеты Зӕлинӕ. Мадзал ацыд Хуссар Ирыстоны Уӕрӕсейаг зонад ӕмӕ культурӕйы центры ӕмархайдӕй", - дзырдӕуы хъусинаджы.
Пушкины балы хайад райстой Хуссар Ирыстоны парламенты спикер Гасситы Петр, республикӕйы ахуырады министр Гасситы Натали, Уӕрӕсейы Федерацийы минӕвар Хуссар Ирыстоны Марат Кулахметов, Уӕрӕсейаг зонад ӕмӕ культурӕйы центры разамонӕг Сергей Скворцов ӕмӕ ӕндӕр официалон гоймӕгтӕ.