ЦХИНВАЛ, 20 май — Sputnik, Плиты Фатимæ. Цхинвалы æрæвнæлдтой Хъалонтæ æмæ фиддонты комитетæн ног бæстыхай амайынмæ, фехъусын кодта Sputnik Арæзтады министрады пресс-службæйы.
Бæстыхай арæзт цæуы Хуссар Ирыстоны 2018-2019 æзты экономикон райрæзты Инвестицион нывæзты фæлгæтты.
"Бæстыхай амайынц Чиаты Иосифы (раздæры Суворовы) уынгыл, йæ фæзуат у 1 400 кв метры. Проектмæ гæсгæ, бæстыхай у цыппар уæладзыгæй конд, уыдонæй иу у ныккæндон. Ныридæгæн фыццаг уæладзыг фæцис арæзт",- загътой пресс-службæйы.
Уым ма банысан кодтой, арæзтад кæй фæнд кæнынц фæуын азы кæронмæ.
Инвестицион нывæзты фæлгæтты Хъалонтæ æмæ фиддонты комитеты бæстыхайы арæзтадæн хицæн æрцыд 55 милуан сомæй фылдæр.