ЦХИНВАЛ, 21 июн - Sputnik. Хуссар Ирыстоны МХМ милицийы сæрмагонд нысаниуæджы къорды (МСНК) кинологон службæйы минæвар йæ кусæгон куыдзимæ бацахста фыццаг бынат кинологты ерысты Ростовы, хъусын кæны республикæйы МХМ пресс-службæ.
Ростоваг сколайы XXI æхсæнведомствæйон ерысты хайад райстой кинологты 30 командæйæ фылдæр Уæрæсейы Хуссарæй, афтæ ма Беларусь, Абхаз æмæ Хуссар Иры мидхъуыддæты министрæдты минæвæрттæ. Рæмудзæн æрмæджытæ æмæ хæцæнгар агурыны хъуыддаджы фыццаг бынат бацахста милицийы лейтенант Тулойты Георгий йæ кусæгон куыдз Арзаимæ.
"Кæй зæгъын æй хъæуы, тынг æхсызгон мын у, уый æппæт тыхджын командæты цур мах дæр кæй ссистæм уæлахиздзаутæ. Фæлæ хорзæхтæ афтæ ахсджиаг не сты, куыд ахæм æвæзады ерысты хайадист. Уымæй мах исæм ног зонындзинæдтæ, дих кæнæм нæ фæлтæрддзинад. Куыйтæн дæр тынг пайда у, удуæлдайæ кусын байдайы æмæ йæ бамбарæм, ацы куыдз иттæг хорз ахуыр кæй у æмæ цæттæ у куыстмæ", - загъта Георгий.
Георгий йæ немыцаг овчаркæимæ рацыд курсытæ кусæгон-фæдагурæн куыдздарды скъолæйы Ростовы. Ахуыртæ цыдысты ХУссар Ирыстон æмæ Уæрæсейы мидхъуыддæгты министрæдты хсæн æмгуыстады бадзырды фæлгæтты.
ХУссар Иры МСНК кинологон службæ арæзт æрцыд 2010 азы. Ацы азы райдайæнæй кинологтæ æмæ сапертæ 160-йæ фылдæр хатт рацыдысты алыгъуызон мадзæлтты бынæттæ сгарынмæ.