ЦХИНВАЛ, 26 май — Sputnik. Арæнгæрон кинологийы сырæзтыл 123 азы сæххæсты цытæн Знауыры районы уагъд æрцыд Хуссар Ирыстоны уæвæг Уæрæсейы ӔФС-йы Арæнгæрон управленийы турнир хуыздæр специалист-кинологы рафæлгъауыны фæдыл, фехъусын кодта Sputnik уацхæссæг.
Фыццагады хайад райстой 4 командæйы горæттаг æмæ районон дæлхайадтæ æмæ Управленийы аппаратæй, кæцытæ ерыс кодтой ахуыр куыйтимæ архайыны дæсниадæй.
Организаторты хъуыдымæ гæсгæ, мадзалы нысан уыд кинологийы специалистты дæсниад фæбæрзонддæр кæнын, ахуыр куыйты цæттæдзинады æмвæзад сбæлвырд кæнын, сæ кусæгон миниуджытæн саргъ кæнын, хуыздæр инструктор-кинологты рафæлгъауын.
Хуыздæр кусджытæ хорзæхджын æрцыдысты майдантæ æмæ грамотæтæй, командæ-уæлахиздзау та — хизгæ кубокæй.
Ерысты фæстиуджытæм гæсгæ, фыццаг бынат бацахста Дменисы командæ, дыккаг — Ленингоры поселочы хайад, æртыккаг бынат бацахста Знауыры командæ, фæстаг бынат та райстой кинологтæ Дзауæй.
