ЦХИНВАЛ, 31 июл - Sputnik. Хуссар Ирыстоны электроэнерги ӕмӕ газы хъалонты ӕмбырдкӕнынад у 65 проценты, афтӕ хъалонтӕ нӕ фӕфидынц республикӕйы цӕрджытӕй дарддӕр паддзахадон организацитӕ дӕр. Уый тыххӕй фехъусын кодта сӕудӕджерад, транспорт ӕмӕ энергетикӕйы комитеты сӕрдар Санахъоты Батрадз хицауады рабадтыл, хъусын кӕны хицауады пресс-службӕ.
Премьер-министр Пухаты Эрик бахахх кодта, зӕгъгӕ, ахӕм хӕстӕ хъуамӕ ма уой, афтӕмӕй Хуссар Ирыстоны иумӕйаг хӕс газ ӕмӕ рухсы ӕввонггӕнджыты раз у ӕрдӕг миллиард сомы.
Пухаты Эрик бафӕдзӕхста хӕсджын организациты разамонджыты, цӕмӕй тагъд рӕстӕджы бафидой хъалонтӕ ӕмӕ хыгъдлӕвӕрд радтой хицауадӕн.
Хуссар Ирыстонмӕ электроэнерги ӕмӕ газ цӕуынц Уӕрӕсейӕ 110 КВт электрондыхы хахх "Зӕрӕмӕг-Цӕгаттаг портал-Дзау"-ыл ӕмӕ Дзуарыхъӕу-Цхинвал газы хӕтӕлыл.