ЦХИНВАЛ, 20 авг – Sputnik, Гӕбӕраты Элина. Хуссар Ирыстоны столицӕйы ӕртыццӕджы, 21 августы ацӕудзӕн стыр концерт "Мелодия души", цы ран хайад райсдзысты цӕгаткавказаг зарӕггӕнджытӕ. Уый тыххӕй Sputnik фехъусын кодта республикӕйы культурӕйы министрады аивӕдты хайады хистӕр Ӕлборты Фатимӕ.
"Концерты хайад райсдзысты номдзыд зарӕггӕнджытӕ Адыгей, Кубань, Мӕхъӕл, Кӕсӕг-Балхъар, Цӕгат ӕмӕ Хуссар Ирыстонӕй", - банысан кодта Ӕлборты Фатимӕ.
Уый ма бафтыдта, мадзалы фӕлгӕтты кӕй ратдзысты ӕхсӕнадӕмон сӕрмагонд орден "Намыс ӕмӕ кад" Хуссар Ирыстоны президент Бибылты Анатолийӕн.
Концерт уыдзӕн ӕнӕаргъ ӕмӕ ацӕудзӕн ПККЗ "Чермен"-ы 18.30 сахатыл.