ЦХИНВАЛ, 1 ноя — Sputnik, Козаты Диана. Фӕдагуырд сбӕрӕг кодта сылгоймаджы амӕлӕты аххосаг, кӕцыйы мӕрдон буар ссардтой майрӕмбоны Цхинвалы Фидауынгӕнджыты уынгыл бирӕуӕладзыгон хӕдзары фатеры.
Сылгоймаджы мӕрдон буар ссарыны фӕдыл хъусинаг бацыд Хуссар Ирыстоны Мидхъуыддӕгты министрады (МХМ) радгӕсон хайадмӕ 11.40 сахатыл.
"Фӕдагурӕн-оперативон къорд цауы бынатмӕ куы бацыд, уӕд ссардта 39-аздзыд Годжысаты Дзерассӕйы мӕрдон буар. Сылгоймаджы буарыл не ссардтой тыхмарды миниуджытӕ", - радзырдтой Sputnik генералон прокуратурӕйы фӕдагуырды хайады.
Цауы бынаты басгӕрсты фӕстӕ, мӕрдон буар арвыстой тӕрхондоны-медицонон экспертизӕты бюромӕ, цӕмӕй сбӕрӕг кӕной амӕлӕты аххосаг.
Сӕйраг тӕрхондоны медицинон эксперты басгӕрстмӕ гӕсгӕ, сылгоймаг амард рӕуджыты геморрагион срӕсыды фӕстиуӕгӕн нозтджынӕй.