ЦХИНВАЛ, 3 дек - Sputnik. Цхинвалы тæрхондон рахаста скъуыддзаг дыууæ мæйы æмгъуыдмæ административон ахæсты тыххæй столицæйы 44-аздзыд цæрæджы ныхмæ, хъусын кæны МХМ пресс-службæ.
"Столицæйы дуканитæй иуы оперативон-сгарæн мадзæлтты фæстиуæгæн Криминалон милицийы кусджытæ ссардтой снюс. Оперативон кусджытæ байстой снюсы 79 къоппы, сæ иумæйаг уæз - 60,4 граммы", - дзырдæуы хъусинаджы.
Дуканийы уæйгæнæджы ма раздæр дæр цалдæр хатты æркодтой бæрнмæ ахæм фыдракæндты тыххæй. Уымæ гæсгæ сылгоймаг бакондæуыд административон ахæсты.
МХМ зæрдыл æрлæууын кодтой, Хуссар Иры тобæгонд кæй сты тамако "снюс" æмæ "насвай"-йы æрбаласт, æлхæнын, æмæ пайда кæнын. Фæткхалджытæм æнхъæлмæ кæсы ивар науæд та дыууæмæйон ахæст.