ЦХИНВАЛ, 17 дек – Sputnik, Гӕбӕраты Элина. Цхинвалы къуырисӕры, 16 декабры, байгом ногазон армукъа. Традицимӕ гӕсгӕ базарадон рӕнхъытӕ сӕвӕрдтой горӕты базары раз Харебаты Исахъхъы уынгыл. Уым ис гирляндӕтӕ, рӕсугъд хъазӕнтӕ ӕмӕ бирӕнымӕц сувениртӕ горӕты цӕрджытӕ ӕмӕ уазджытӕн.
Базары рӕнхъыты фылдӕр хай нырма гом нӕу, фӕлӕ тагъд рӕстӕджы бирӕнымӕц уӕйгӕнджытӕ райдайдзысты уӕй кӕнын сӕ продукци. Армукъа кусдзӕн суанг Ног азы онг.
Амалиуӕггӕнджытӕй иу куыд радзырдта Sputnik, афтӕмӕй ацы аз хъазӕнтӕ хицӕн кӕнынц ӕнахуырдзинадӕй – армукъайы бавдыстой бирӕ къухӕй арӕзт куыстытӕ.
"Армукъайы бавдисдзыстӕм алыгъуызон фӕлындӕнтӕ. Афтӕ ма ӕрмхудтӕ ӕмӕ цъындатӕ наз бӕласӕн, фӕлындӕнтӕ ӕмӕ гирляндӕтӕ", - радзырдта чызг-уӕйгӕнӕг.
Назы бӕласы хъазӕнтӕ гӕнӕн ис балхӕнын 15-ӕй 500 сомы онг аргъӕй. Хъазӕнтӕ, гирляндӕтӕ ӕмӕ алыгъуызон фӕлындӕнтӕй дарддӕр армукъайы гӕнӕн ис балхӕнын аразгӕ назы бӕлас дӕр.
Ногазон армукъайӕн нырма нӕй егъау масштаб, фӕлӕ фыццаг клиенттӕ ныридӕгӕн тезгъо кӕнынц ӕмӕ ӕлхӕнынц назы бӕласы фӕлындӕнтӕ.