ЦХИНВАЛ, 19 дек - Sputnik. Хуссар Ирыстоны президент Бибылты Анатолий бабӕрӕг кодта Паддзахадон телерадиокомпани "Ир", цы ран хайад райста ногазон акци "Бӕллицты фонтан"-ы, хъусын кӕны паддзахады сӕргълӕууӕджы пресс-службӕ.
Хæрзаудæн проект æххæст цæуы ныр æтыккаг аз. Йæ фæлгæтты республикæйы сæдæгай сабитæн сæ ногазон бæллицтæ сæххæст кæнынц амалхъом адæм. Сывӕллӕттӕ ауагътой фонтаны наутӕ фыстӕджытимӕ, кӕцытӕ здӕхт сты Митын Дадамӕ.
Проекты амонӕг Сабанты Мӕдинӕ загъта бузныг Бибылты Анатолийӕн, ӕрвылаз кӕй ӕххӕст кӕны сывӕллӕтты бӕллицтӕ, уый тыххӕй.
Паддзахады сӕргълӕууӕг радзырдта, йӕ иууыл стырдӕр бӕллиц кӕй уыд бацӕуын ӕфсӕддон ахуыргӕнӕндонмӕ - ӕмӕ ацы бӕллиц сӕххӕст ис.
Традицимӕ гӕсгӕ Бибылты Анатолий систа фонтанӕй ӕртӕ науы, кӕцыты республикӕйы скъолаты кӕстӕр къласты ахуырдзаутӕ бадзырдтой Митын Дадамӕ, цӕмӕй сын балӕвар кӕна велосипедтӕ, Цхинвалы дыккӕгӕм астӕуккаг скъолайы ахуыргӕнинаг та ракуырдта балхӕнын 50 кг конфеттӕ скъола интернаты сывӕллӕттӕн, цӕмӕй сын балӕвар кӕна бӕрӕгбоны ӕнкъарӕнтӕ.